Eftirlitsnefnd um jafnan aðgang fjarskiptafyrirtækja að kerfum, tæknilausnum og þjónustu heildsölu Mílu og heildsölusímans

Nefndinni var komið á fót með ákvörðun Samkeppniseftirlitsins nr. 6/2013 sem fól í sér sátt milli Samkeppniseftirlitsins, Skipta hf., Símans hf. og Mílu ehf. Við samruna Skipta hf. og Símans hf. í ársbyrjun 2015 voru gerðar breytingar á sáttinni sem Samkeppniseftirlitið birti sem ákvörðun nr. 6/2015.

Að ósk Símans hf. og Skjásins ehf. var ákvörðun samkeppnisráðs nr. 10/2005 felld niður á fyrri hluta árs 2015 og í staðinn kom ný sátt sem birt er sem ákvörðun Samkeppniseftirlitsins nr. 20/2015. Í þessari sátt er nefndinni falið að hafa eftirlit með að skilyrðum sáttarinnar sé fylgt.

Nefndin starfar í samræmi við það hlutverk sem skilgreint er í sáttunum. Í meginatriðum er starf nefndarinnar að:

Fylgjast með innleiðingu sáttanna
Taka við kvörtunum og/eða ábendingum frá fjarskiptafyrirtækjum sem telja að ekki hafi verið farið að sáttum þessum og kjósa að senda eftirlitsnefndinni erindi þar að lútandi
Hafa eftirlit með því að fyrirmælum í sáttunum sé fylgt. Er nefndinni í því sambandi heimilt að veita Mílu og viðskiptavinum hennar fyrirfram leiðsögn um túlkun skilyrðanna að því marki sem það er framkvæmanlegt
Upplýsa og tilkynna Símanum og Mílu um það hvernig farið er að skilyrðum sátta þessara með sérstaka áherslu á jafnræðiskvaðir Mílu og heildsölu Símans
Greina Samkeppniseftirlitinu frá því ef nefndin verður þess vör að skilyrði sáttanna kunni að hafa verið brotin

Eftirlitsnefndin hefur sett sér verklagsreglur sem nánar skilgreinir hvernig störfum nefndarinnar er háttað.

Í nefndinni eru 3 menn sem allir eru óháðir Símanum og Mílu:

Gylfi Árnason verkfræðingur, formaður nefndarinnar
Stefán Geir Þórisson, hrl.
Sæmundur E. Þorsteinsson, verkfræðingur

Hægt er að senda nefndinni ábendingar og kvartanir á póstfangið ejaf@ejaf.is, eða beint til formanns á heimilisfangið Þórsgata 2, 101 Reykjavík.

Eftirlitsnefnd um jafnan aðgang fjarskiptafyrirtækja að kerfum, tæknilausnum og þjónustu heildsölu Mílu og heildsölu Símans - EJAF